ភ្នំពេញ៖ នាយកដ្ឋាននគរបាលព្រហ្មទណ្ឌ បានចេញសេចក្តីបំភ្លឺអំពីករណីជនស្លៀកពាក់បែបស៉ីវិលមួយក្រុម ប្រើប្រាស់កាតមានសញ្ញានគរបាលព្រហ្មទណ្ឌ ចំនួន២រូប ទៅធ្វើសកម្មភាពឃាត់មនុស្សមួយក្រុម តាមបណ្ដោយផ្លូវសហព័ន្ធរុស្ស៉ី ស្ថិតក្នុងខណ្ឌសែនសុខ រាជធានីភ្នំពេញ។

ប្រធាននាយកដ្ឋាននគរបាលព្រហ្មទណ្ឌ ឧត្តមសេនីយ៍ឯក ង៉េង ជួ បាន បញ្ជាឱ្យធ្វើការស្រាវជ្រាវលើករណីខាងលើជាបន្ទាន់ក្រោយឃើញបាតុភាពនៃការចែកចាយតាមបណ្ដាញសង្គម។

នាយកដ្ឋាននគរបាលព្រហ្មទណ្ឌបានឱ្យដឹងថា ក្នុងចំណោមជនស៉ីវិលទាំងនោះមានម្នាក់ មន្ដ្រីនគរបាលរបស់នាយកដ្ឋាននគរបាលព្រហ្មទណ្ឌ (មិនមានក្នុងរូប) ដែលនៅពេលនេះនាយកដ្ឋានកំពុងធ្វើការសួរនាំតាមនីតិវិធីជំនាញ។ ប៉ុន្ដែមនុស្ស២នាក់ផ្សេងទៀត ដែលពាក់កាតមានសញ្ញានគរបាលព្រហ្មទណ្ឌ មិនមែនជាមន្ដ្រីនគរបាលបម្រើការងារនៅនាយកដ្ឋានឡើយ។

ប៉ុន្ដែទោះជាយ៉ាងណា ករណីនេះនាយកដ្ឋាននគរបាលព្រហ្មទណ្ឌ កំពុងបន្ដស្រាវជ្រាវយ៉ាងយកចិត្តទុកដាក់ និងស្វែករកអ្នកពាក់ព័ន្ធ ព្រមទាំងដើមចមនៃហេតុការណ៍នេះ។ នាយកដ្ឋាននគរបាលព្រហ្មទណ្ឌ បានថ្លែងអំណរគុណចំពោះការផ្ដល់ព័ត៌មានពីសាធារណៈ និងអ្នកសារព័ត៌មានទាំងអស់៕